Merking lita í draumi

Um liti gildir, eins og um fleiri draumtákn, að ekki verður gefin upp ein einhlít upptalining á merkingu þeirra eða gildi fyrir ráðningu drauma. Þannig getur samsetning lita verið afgerandi og einnig hverning viðkomandi dreymandi sér og skynjar liti. Einnig hreinlega hvernig viðkomandi persónu líka viðkomandi litir.

Litasamsetningar sem geta verið afgerandi eru:

1) Bjartir og hreinir litir, sem yfirleitt tákna bjartsýni, lífsgleði, kærleika og lífsorku
2) Mikill blámi sem táknar heilindi, andlega tengingu, heilun, lærdóm og visku
3) Dumbúngs litir geta táknað mótlæti, vonleysi, þróttleysi og ákveðinn vanmátt, en einnig festu og stöðugleika. 

Þegar litir í draumum eru skoðaðir er einnig fróðlegt og gagnlegt að skoða þá og bera saman við liti orkustöðvanna sjö eða liti bliksins (árunnar).

  

Litir orkustöðvanna, bliksins.

Hvirfilstöð – hinn hugræni þáttur, tenging við alheimsorkuna – Fjólublátt / hvítt
Ennisstöð – tilfinningalegur þáttur, sjálfið – Indigóblátt
Hálsstöð - efnisþættir, tjáning - Blátt
Hjartastöð – kærleikur – Grænn
Solar Plexus – lægri hugrænn þáttur, andleg viska – Gulur
Magastöð – lægri tilfinningaþáttur, tilfinningar – Appelsínugulur
Rótarstöð – tengsl við efnisheiminn, lífsviljinn - Rautt 

Gildi lita í draumum, einföld upptalning síðuritara

Blár: róandi, friður, sannleikur, vinátta, tjáning, velgengi, heilun, andlegur litur og andleg leiðsögn

Fjólublár: sjálfstæði, kraftur, andleg viska, andlegur þroski og heilun, hugsjónir

Rauður: kraftur, lífsorka, líkamleg heilsa, viljastyrkur, ástríður, hreyfing

Rauðgulur / appelsínugulur: sköpun, hugmyndir, sjálfstraust, tilfinningar, lífsgleði, metnaður, kynlíf og félagslyndi.

Gulur: kærleiki, viska, frelsi, bjartsýni, opin hugur, sjálfstraust, aðdráttarafl

Bleikur: ást, vinátta, heiður, rómantík, kærleikur, virðing.

Grænn:, frjósemi, velgengni, heppni, endurnæring, kærleikur, fegurð, heilun

Svartur: vörn, mótlæti, einangrun, staðfesta, áform

Brúnn: jarðtenging, öryggi, hagsýni, skuldbindingar, eljusemi

Blágrænn: samskipti, sköpun, listræn gildi

Hvítur: friður, sannleikur, andlegur styrkur, hreinleiki, hugleiðsla, heilun, vörn, hamingja

Gull: sólarorkan, hinn guðlegi neisti og kraftur, skilningur, viska og innsæi

Silfur: andleg vörn, hin guðlega orka, stöðugleiki, dulrænir hæfileikar

Eins og áður segir er ekki til einhlítar skýringar á gildi lita í draumum. Hér á eftir verða raktar nokkrar sem þekktar eru meðal draumráðenda og hafa birst á prenti.

Eftirfarandi upptalning gefur mynd af hefðbundnum skýringum á gildi lita í draumum

(aðallega byggt á bók Þóru Elfu Björnsson, Draumarnir þínir, Hörpuútgáfan 2004) 

Blátt: mjög góður litur, merkir réttlæti og frið, trúarleg og andleg málefni og er oft tengdur lærdómi, göfuglyndi og ræktarsemi. Getur einnig verið tákn um að slaka á, hægja aðeins ferðina.

Gráblátt: er merki um lasleika og volk. Getur einnig tengst eftirlátssemi við lítilmótlegar hvatir.

Fjólublátt: er bætandi litur og tengist háleitum markmiðum.

Rautt: er sagt tákna glaðlyndi, vináttu og hreyfingu á hlutum og ekki síst lífskraft og orku.En rautt getur líka táknað reiði, árásargirni og hættuástand

Rauðgulur eða appelsínugulur litur getur í sumum tilvikum táknað hreysti og lifsgleði en í öðrum hatur og hörmungar.

Gult er sagður einn göfugasti liturinn ef hann er skær og hreinn. Hann tengist sólinni og lífinu – lífsorkunni – og er merki kærleika, visku og innsæis. En móskulegur og óhreinn gulur litur er sagður tákn illra afla, merkir svik, græðgi, óheilindi, hlutleysi. 

Grænt er litur gróanda og vaxtar, einnig í manneskjunni sjálfri. Hreinn grænn litur merkir vonir og dugnað, jafnvægi og góða heilsu. En sé hann blandaður eða óskýr getur hann táknað óþroskað fólk, hálfgerða græningja, og jafnvel illa innrætt fólk. 

Blágrænn litur tengist oft skapandi störfum, myndlist, skáldskap og öðru í svipuðum dúr. 

Brúnt: er jarðbundinn og nokkuð oft neikvæður litur en brún mold getur verið fyrir góðu.

Svart er litur sorgar, vonleysis, þunglyndis, tómarúms og glataðra tækifæra. Jafnframt getur svart táknað staðfasta og einlæga ákvörðun dreymandans í persónubundnu máli, t.d. ef dreymandinn er klæddur í svart. 

Hvíti liturinn táknar styrk og góð öfl, hann getur táknað einfaldleika og andlegt jafnvægi. Sumir telja hann sorgarlit eða merki um dulda löngun til að vera ekki með – vera nánast litlaus og lítið áberandi. 

Dreymir dýr og eru til rannsóknir á því?

Margir hafa efalaust velt því fyrir sér hvort dýrin dreymi líkt og mannfólkið. Á þessu hafa verið gerðar þó nokkrar rannsóknir, en þar sem um málleysingja er að ræða er viðfangsefnið nokkru flóknara.

Samkvæmt niðurstöðu vísindagreinarinnar "Animals have complex dreams, MIT researcher proves" dreymir dýr jafnvel flókna drauma og hegðun þeirra í draumsvefni er ekki alls ólík því sem gerist hjá mannfólkinu.

Hér er birt brot úr greininni sem gefur vísbendingu um innihaldið:

"No one knew for certain that animals dreamed the way we do, which can involve replaying events or at least components of events that occurred while we were awake," said Matthew Wilson of MIT's Center for Learning and Memory. "We looked at the firing patterns of a collection of individual cells to determine the content of rats' dreams. We know that they are in fact dreaming and their dreams are connected to actual experiences."

(Mynd: dreaming rat, sem fylgir greininni)

 

Eftirfarandi samantekt er fengin af vísindavefnum

"Rannsóknir á svefni dýra eru fyrst og fremst byggðar á atferlisathugunum en einnig, þar sem því verður við komið, á beinum mælingum. Þá eru mældir ýmsir lífeðlisfræðilegir þættir, þar á meðal heilarit, vöðvaspenna, öndun og hjartarit.
Aðeins lítið brot af fjölskrúðugri tegundamergð dýraríkisins hefur verið skoðað í þessu augnamiði. Líklegt er að flest dýr taki sér hvíld og/eða sofi á hverjum sólarhring, þar á meðal hryggleysingjar og fiskar. Fuglar og spendýr verja ákveðnum tíma sólarhringsins í svefn, ýmist að degi eða nóttu. Sá tími er mjög mislangur eftir tegundum. Meðal spendýra sofa hestar og fílar einna styst, 3 til 4 klukkustundir, en leðurblökur einna lengst, tæplega 20 klst. Algengustu heimilisdýrin, kettir og hundar sofa um það bil 13-14 klst. á sólarhring.

Svefn skiptist í tvo meginhluta, hægan svefn (NREM, synchronized) og draumsvefn (REM, paradoxical) sem skiptast á með reglubundnum hætti. Með lífeðlisfræðilegum mælingum (svokölluðu svefnriti) má greina á milli. Hægur svefn einkennist af hægum og öflugum heilabylgjum, slökun í líkamsvöðvum og reglubundinni öndun og hjartslætti. Í draumsvefni mælast hins vegar hraðar, lágspenntar heilabylgjur, hraðar augnhreyfingar (rapid eye movement) og enn lægri vöðvaspenna en í hægum svefni. Örsmáir kippir mælast þó í vöðvum. Öndun er óregluleg sem og hjartsláttur. Þegar sofandi maður er vakinn upp af draumsvefni getur hann lýst á myndrænan hátt, því sem gerðist í draumnum. Hlutfall draumsvefns er að jafnaði 10-20% af heildarsvefntímanum.

Svefnrit eins og að framan er lýst sem tekin hafa verið af ýmsum dýrum, þar á meðal köttum, sýna að þau sofa draumsvefni. Með beinum athuganum á atferli dýra, til dæmis sofandi kisu, sjást einnig skýr einkenni draumsvefns: Hraðar augnhreyfingar, smáhreyfingar á eyrum, veiðihárum og jafnvel loppum, auk óreglulegrar öndunar. Rannsóknir hafa sýnt að kettir, sem hafa skaddaðar taugar sem valda vöðvaslökun í draumsvefni, hreyfa sig á þessu svefnstigi, stundum líkt og þeir væru að bera sig eftir bráð. Af því hafa menn dregið þá varkáru ályktun, að hugsanlega séu kettirnir að upplifa drauma sína, ef til vill um sællega og bústna mús sem bíður þeirra innan seilingar. Hins vegar verður spurningunni um það hvort dýr dreymi myndræna drauma líklega aldrei svarað á óyggjandi hátt".

Er hægt að þjálfa sig í að muna drauma?

Mörgum reynist erfitt að muna drauma sína. Oft koma löng tímabil þar sem viðkomandi finnst hann ekkert dreyma, en síðan allt í einu kemur einn og einn draumur sem situr eftir í vitundinni að morgni.

Spurningin er hvort hægt sé að þjálfa sig í að muna drauma?

Margar aðferðir hafa verið reyndar og kenndar í gegnum tíðina, en lykilatriði fyrir hvern og einn er að hafa áhuga og viljann til að muna draumana sína til að ná árangri.

Hér vil ég til gamans benda á aðferðir sem Draumasamtökin,
"The Dreams Foundation" í Canada mæla með.

Á heimasíðu samtakanna er að finna leiðsögn um hverning megi þjálfa sig í að muna betur drauma.

Dream Recall Techniques - Remember more Dreams

Svo rætist hver draumur sem ráðinn er

Mikilvægt er að hafa í huga að engin einhlít skýring eða ráðning er til á hverjum draumi. Varast ber því að fullyrða um of þegar átt er við draumráðningar. Draumar sem í fyrstu virðast líkir eða jafnvel eins geta haft mismunandi merkingu allt eftir tilfinningu dreymandans fyrir draumnum eða aðstæðum viðkomandi. Mikilvægt er því hverjum og einum að skrá niður líðan sína og tilfinningar þegar draumar eru skráðir niður eigi að ráða í þá.

Svokallaðir forspárdraumar geta gefið vísbendingar um óorðna hluti og þannig veitt dreymandanum ákveðna leiðsögn. Draumar geta líka átt rót sína í daglegu amstri dreymandans, áhyggjum og erfiðleikum sem viðkomandi á við að stríða. Slíkir draumar hafa yfirleitt minna forspárgildi.

Gamalt máltæki segir að "svo rætist hver draumur sem ráðinn er". Þetta ber að hafa í huga einnig þegar draumar eru skoðaðir og fengist er við draumráðningar. Þannig ber að varast að trúa bókstaflega á slæm draumtákn og bíða þess að þau rætist. Þess í stað er mikilvægt að horfa á þá jákvæðu leiðsögn sem í draumunum getur falist og nýta hana til að sneyða hjá erfiðleikum með opnum huga og bjartsýni.

Við þekkjum hversu miklu auðveldara og ánægjulegra er að vinna að því að láta góða drauma rætast, þar gegnir hugur og viðhorf dreymandans lykilhlutverki.

Hvað dreymir okkur helst?

Hvað dreymir okkur helst? Margar rannsóknir hafa verið gerðar á því víða um heim. Hér langar mig að benda á eina Íslenska könnun sem gerð var af Gallup árið 2003 fyrir sálfræðistöðina Strönd og Draumasetrið Skuggsjá (könnunin er aðgengileg á netinu).

 

Samkvæmt þeirri könnun voru helstu atriði þessi:

 

Form sem fólk dreymir: fólk (88%), hús, landslag, herbergi

 

Tilfinningar sem fólk dreymir: gleði (algengust 73,6%), ótti, ástúð, von, kvíði

 

Helstu athafnir: að vera með öðrum (algengast 78,2%), að tala, að ferðast, að gera eitthvað skemmtilegt, að deila við aðra/rífast.

 

Könnunina og fróðleik tengdan henni má finna hér

Draumar geyma svör og leiðsögn

Oft dreymir okkur drauma sem kalla til okkar eins og þeir vilji segja okkur eitthvað. Tilfinningar sem fylgja þeim geta verið mjög mismunandi, allt frá sælutilfinningu sem fær dreymandann til að vilja ekki sleppa takinu og halda áfram að dreyma, og til þess að viðkomandi vakni upp af draumi með ónota og kuldahroll.

Hafa draumar eitthvað að segja okkur? og getum við sótt leiðbeiningu til þeirra?

Það er staðföst trú síðuritara að svo sé og meiningin er að helga þetta blogg fróðleik um drauma. Hversu miklum tíma ég get varið til þess verður að koma í ljós.