Rúm 89 prósent trúa á merkingu drauma

Draumar og draumráðningar hafa fylgt Íslendingum allt frá örófi alda ekki síður en öðrum þjóðum. Drauma er víða getið í fornsögum okkar og kristnum ritum og svo lengi sem þekkt er hafa menn og konur reynt að ráða í drauma.

Hér á draumablogginu hefur verið skoðanakönnun í gangi þar sem spurt er hvort fólk trúi því að draumar geti verið fyrirboðar einhvers. Niðurstöðurnar eru afgerandi og  áhugaverðar því 89,4 prósent þeirra sem taka þátt trúa því eða hafa af því reynslu.

 

 

 

 

 

 

 

 

 

Aðeins 3,3 % eru hlutlaus og 7,4 % segjast ekki vita það meðan enginn svarar neitandi.
Þegar þessi samantekt er gerð hafa 122 svarað og getur þessi könnun því talist ágætis vísbending, allavega í þeim hópi sem leitar að slíku á netinu.

draumar.blog.is vill nota þetta tækifæri til að þakka þeim fjölmörgu sem staldrað hafa við á síðunni og þá sérstaklega þeim sem hafa lagt inn drauma sína í gestabók bloggsins til ráðningar. Það að fá alla þessa drauma hefur verið síðuritara ómetanlegt. Bæði hefur verið einstaklega gaman að fá jákvæð viðbrögð og þakklæti fyrir draumráðningar og einnig hefur þetta gefið mér tækifæri til að auka innsýn mína í margbreytileika drauma til muna.

Óska öllum góðs komandi árs og þakka það sem er að líða.

Draumar

Athugasemdir

[Sigríður Sigurðardóttir, 1.1.2008 kl. 15:58]

  Að draumarnir okkar boði eitthvað, er enginn spurning.  Að læra að lesa úr draumtáknunum, er allt annar handleggur.  Og mínir draumamenn og konur þar fyrir handan hafa "einstaklega" gaman af því að bæta nýjum og nýjum táknum við, og gera mig alveg MÁT!  Hef þó dundað mér við að skrifa niður drauma síðan ég var unglingur.  Skemmtilegt að sjá hversu margir eru jákvæðir í könnuninni.

[Draumar, 1.1.2008 kl. 16:28]

Takk fyrir innlitið Sigríður.

Ný draumtákn, já það er nú það skemmtilega við þetta allt. Draumar verða aldrei ráðnir með því að fletta upp í bókum, þó margar ágætar hafi verið skrifaðar um draumtákn og ráðningar drauma. Hluti af þessu er að breyttar lífsvenjur, breytt samfélag kalla fram ný draumtákn og á vissan hátt nýja drauma. Þannig er ekki eins algengt að fólk dreymi t.d. kindur og heyskap í dag sem áður gat svarað ýmsum hlutum úr draumum. Í dag dreymir okkur lestar, flugvélar, bíla frekar en hesta og hestakerrur svo eitthvað sé nefnt þegar draumarnir eru að koma inná ferðalag okkar um lífið, þ.e. lífshlaup okkar og/eða löngun til að komast frá hversdagsleikanum.

Það skemmtilegasta við þetta allt er svo að draumtákn geta verið mjög einstaklingsbundin og tilfinning dreymandans fyrir draumnum getur skipt mestu um ráðningu, sem og innsægi draumráðandans.

[Sigríður Sigurðardóttir, 1.1.2008 kl. 17:36]

  Mikið sammála þér draumráðandi, um að nýir tímar og breyttar lífsvenjur kalli á ný draumtákn.  Og draumráðningabækur koma að takmörkuðum notum, því eins og þú orðar það svo vel, "draumtákn eru einstaklindsbundin".  Mín reynsla er sú að reynsluheimur dreymandans sé oft sá brunnur sem sótt er í, þegar kemur að draumtáknum.  Í mínum draumum er "eldgos" t.d. ætíð fyrirboði dauða, mér einhverjum nákomnum.  Og þar er ég að ræða um mína nánustu fjölskyldu og vini.  Enda lenti ég tæplega 13 ára í eldgosi á Heimaey, og sú reynsla hefur markað djúp spor í mína sál.  Elgos í draumum annara  hef ég aldrei orðið vör við að boðaði dauða.

[Draumar, 1.1.2008 kl. 19:49]

Takk fyrir að deila þessu Sigríður.

Eldgos er einmitt mjög forvitnilegt draumtákn. Fyrir mörgum og þar með talið mér er það tákn um tilfinningahita af einhverju tagi og skyndilegar breytingar eða umrót. Síðan getur það að sjálfsögðu verið fyrirboði jarðhræringa og eldgosa, sé um klárt berdreymi að ræða.

Ég hef þó lesið í heimildum að eldgos geti verið fyrirboði dauðfalla hjá nákomnum, en slíkt kemur fyrir í draumráðningabók Þóru Elfu Björnsson, Draumarnir þínir, en þar segir um eldgos: "Gættu að þér að eyðileggja ekki góða vináttu með skapofsa og ósanngirni. Draumur um eldgos getur táknað miklar breytingar á högum fjölskyldunnar, sumir segja það tákni mannslát".

[Árni þór, 2.1.2008 kl. 00:00]

Guð talar í gegnum drauma og hef ég fengið marga slíka, ekki eru samt allir draumar þannig.
Þegar draumarnir eru frá Guði þá bara veit maður það og einnig hvað Guð er að segja líka.
Tek það fram að ég hef meðtekið Jesús sem frelsara minn.