Hallgrímskirkja á hliðina

Þessi draumur/ábending barst frá:  Sólmundur Friðriksson, fim. 27. mars 2008

Datt inn á þessa síðu fyrir forvitnis sakir. Hef lítið verið að pæla í draumum en dreymdi einn í nótt sem ég varð að skrifa niður (hef aldrei gert slíkt). http://soli.blog.is/blog/soli/entry/486378/ Hef þá skoðun á draumatáknum að hver og einn þurfi að læra á sína og þá er það að finna út hvað kirkja þýðir hjá mér. Kv, Sólmundur

Svar/draumráðning:

Sæll Sólmundur og takk fyrir innlitið. Ég er hjartanlega sammála þér varðandi það að draumtákn geta verið mjög einstaklingsbundin og mikilvægt að hver og einn nái að læra á sína drauma til að túlka og lesa úr þeim. Enginn er betri draumráðandi en dreymandinn sjálfur sem nær tengingu við táknin í eigin draumi. Miklu skiptir einnig fyrir dreymandann að taka mark á þeirri tilfinningu sem viðkomandi fær fyrir draumnum, eins og ótta, hræðslu, vellíðan, gleði o.s.frv., því slíkar tilfinningar geta oft leitt dreymandann nær svari draumsins.

En örlítið að draumnum þínum, sem ég las á blogginu þínu og finnst afar áhugaverður. Ástæða þess er sú að þessi draumur er mjög sterkur og með táknum sem afar ólíklegt er að þú hefðir verið að hugsa um í vöku eða yfirleitt að velta þér uppúr, "hrun Hallgrímskirkju". Kirkjuturn þykir almennt gott draumtákn og er þá gjarnan bendlaður við hamingju og endurgoldna ást. Hruninn turn er á hinn bóginn ekki jafn jákvætt og gæti verið fyrirboði um brostnar vonir af einhverju tagi. Í þessum draumi þínum er þó eitthvað sem segir mér að fall Hallgrímskirkju, sem er ákveðið borgartákn og tákn festu, geti falist fyrirboði stórra óvæntra hluta sem gerast í samfélaginu frekar en í þínu persónulega lífi. Fráfall einhvers mikils metins eða þá að einhverjar stoðir í samfélaginu bregðast, hlutir sem fólk treystir að ekkert geti haggað, en komi svo eins og köld gusa að allt annað sé uppá teningnum.

Þú skalt ekki líta á þetta sem ráðningu á draumnum þínum, miklu fremur sem nálgun mína við að skoða hann myndrænt, þar sem ég þekki ekkert til þín eða þinna og hvað það er sem þú ert að fást við. Hins vegar kæmi mér ekkert á óvart að einhver ljós myndu kvikna hjá þér við að lesa þetta varðandi það að ráða drauminn þinn. Taktu vel eftir fyrstu hugboðum sem skjóta upp kollinum, hversu fjarstæðukennd sem þau kunna að virðast í fyrstu, því þar er nefnilega oft lykilinn að ráðningunni að finna.

Óska þér alls hins besta :)

p.s. til annarra sem skilið hafa eftir drauma hér á blogginu að undanförnu. Ég vona að ég fari að taka mér tak og koma með ráðningar á þeim, en ég hef því miður ekkert náð að sinna þessu bloggi að undanförnu :)

Athugasemdir

[Sólmundur Friðriksson, 3.4.2008 kl. 12:57]

Bestu þakkir fyrir þetta. Ég er nokkuð sammála þessari ráðningu því draumnum fylgdi svo sterk tilfinning að þetta snerti alla, ekki bara mig.

Þetta að skrifa niður drauma er svolítið magnað fyrirbæri, því oft dreymir mann eitthvað sem maður svo gleymir strax í amstri dagsins. Ég held að það sé manni mjög hollt; að hlusta á huga sinn í draumi ekki síður en líkama sinn og huga í vöku. Margir andans menn hafa haft þennan háttinn á og get ég nefnt afa minn sem var skáld og bóndi fyrir austan (Sigurjón í Snæhvammi), en hann skráði mikið niður drauma sína.